Боздид аз рафти корҳои васлу насби марҳилаи 3-юми хати конвеерӣ дар дохили нақби КТ-9-и Неругоҳи барқи обии “Роғун”

09.08.2023

http://www.president.tj/node/31195

9 август Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Неругоҳи барқи обии “Роғун” бо рафти корҳои васлу насби марҳилаи 3-юми хати конвеерӣ дар дохили нақби КТ-9 шинос шуданд.

Иттилоъ дода шуд, ки дарозии умумии хати конвеерӣ дар марҳилаи сеюм 7 ҳазору 500 метрро ташкил намуда, аз он 2 ҳазору 95 метраш аз дохили нақб мегузарад.

Айни замон васлу насби хати конвеерии Т-1, Т-2 дар дохили нақб ба масофаи 1 ҳазору 700 метр бо сатҳу сифати баланд ба анҷом расонида, дар қисматҳои боқимонда корҳои оҳану бетонӣ идома дорад.

Дарозии умумии хатҳои конвеерӣ 11 километр буда, дар марҳилаҳои 1 ва 2 — юми он корҳои сохтмонӣ ба масофаи 4 ҳазору 795 метр анҷом дода шудаст.

Хатҳои конвеерӣ махсус барои кашонидани сангу шағал ва дигар ҷинсҳои кӯҳӣ ҷиҳати вусъат бахшидани корҳои сохтмони сарбанди иншооти аср — Неругоҳи барқи обии “Роғун” сохта барои таъмини мунтазами корҳои бунёдӣ дар биефи поёнии сарбанд мусоидат менамояд.

Тариқи хатҳои конвеерӣ дар 1 соат 6 ҳазор тонна сангу шағал ва дигар ҷинсҳои кӯҳӣ интиқол дода мешавад ва барои чунин миқдор масолеҳи сохтмониро тариқи мошинҳои гаронвазн интиқол додан 2 соат зарур аст.

Ба Сарвари давлат муҳтарам Эмомалӣ Раҳмон иттилоъ дода шуд, ки интиқоли масолеҳи сохтмонии сангу шағал тариқи хатҳои конвеерӣ бехатар ва босуръат буда, ҳамзамон дар самти сарфаи вақт, маводи сӯзишворӣ, дар ҳолати хуби корӣ нигоҳ доштани техникаву механизми гаронвазни борбардор ва суръати корҳои сохтмонӣ дар сарбанди Неругоҳи барқи обии “Роғун” мусоидат менамояд.

Дастгоҳу таҷҳизоти хатҳои конвеерӣ аз хориҷи кишвар ворид шуда, васлу насби он бо ҷалби мутахассисони ватанӣ идома дорад.

Барои васлу насби хатҳои конвеерӣ дар қисми поёнии сарбанди неругоҳ бунёди 4 такягоҳ ба назар гирифта шудааст, ки айни замон дар сетои он корҳои оҳану бетонӣ дар арафаи анҷомёбӣ қарор дошта, дар яктои дигар корҳои омодасозии майдончаи такягоҳ бо ҷалби техникаи соҳавӣ ва риояи қоидаҳои бехатарӣ идома дорад.

Корҳои сохтмонӣ ва васлу насби хатҳои конвеериро кормандону мутахассисони ҶСК “Тоҷикгидромонтаж” ба анҷом мерасонанд.

Президенти Ҷумҳурии Тоҷикистон муҳтарам Эмомалӣ Раҳмон зимни шиносоӣ бо рафти корҳои васлу насби хатҳои конвеерӣ ба мутахассисону сохтмончиён дастур доданд, ки корҳои боқимонда ҳарчи зудтар, бо сатҳу сифати баланд ба анҷом расонда шаванд.









Асосгузори сулҳу Ваҳдати миллӣ,
Пешвои миллат, Президенти
Ҷумҳурии Тоҷикистон
Эмомалӣ Раҳмон

Даҳсолаи байналмилалии амал «Об барои рушди устувор», солҳои 2018-2028