МАРОМИ ПОЙТАХТ

Навидҳо

Мулоқот бо Раиси амалкунандаи Созмони амният ва ҳамкорӣ дар Аврупо, Вазири корҳои хориҷии Подшоҳии Шветсия хонум Анн Линде

15 апрел дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Раиси амалкунандаи Созмони амният ва ҳамкорӣ дар Аврупо, Вазири корҳои хориҷии Подшоҳии Шветсия хонум Анн Линдеро ба ҳузур пазируфтанд.

Дар вохӯрӣ маҷмуъи васеи масоили ҳамкории Тоҷикистону Подшоҳии Шветсия, ҳамчунин робитаҳо дар доираи Созмони амният ва ҳамкорӣ дар Аврупо мавриди баррасӣ қарор дода шуд.

Дар оғози мулоқот Президенти мамлакат муҳтарам Эмомалӣ Раҳмон таъкид доштанд, ки мо ба пешбурди ҳамкориҳо бо Шветсия ҳамчун шарики боэътимод дар Аврупо таваҷҷуҳи зиёд зоҳир мекунем.

Ҷонибҳо таҳкиму густариши ҳамкориҳои барои ҷонибҳо судмандро дар соҳаҳои мухталифи сиёсӣ, робитаҳои байнипарлумонӣ, иқтисоду тиҷорат, маориф, амният ва тағйирёбии иқлим, зарур шумурданд.

Дар мулоқот вазъи кунунии робитаҳои Тоҷикистон бо САҲА дар доираи се ченаки фаъолияти Созмон - сиёсию низомӣ, иқтисодию экологӣ ва инсонӣ муҳокима карда шуд.

Вобаста ба паёмадҳои короновирус пешниҳод гардид, ки дар доираи ҳамкорӣ САҲА барномаҳои марбутаи худро ба коҳиш додани пайомадҳои вируси нави сироятӣ равона сохта, кӯмакҳои амалӣ ва техникиро дар ин самт зиёд гардонад.

Зимни мулоқот ҷонибҳо оид ба ҳалли масъалаҳои доғи рӯз, пешгирӣ ва аз байн бурдани таҳдиду хатарҳои ҷаҳони муосир, аз қабили муқовимат ба терроризму экстремизм ва маблағгузории онҳо, гардиши ғайриқонунии маводи мухаддир ва силоҳи сабук, ҷиноятҳои киберӣ ва ҷинояткории муташаккили фаромиллӣ, таваҷҷуҳ зоҳир карданд.

Вазири корҳои хориҷии Подшоҳии Шветсия дар навбати худ талошҳои ҷониби Тоҷикистонро ҷиҳати иҷрои уҳдадориҳояш дар доираи созмон, ҳамчунин нақши пешсафии кишвари моро дар пешбурди масъалаҳои глобалии вобаста ба об махсус таъкид карда, ҷонибдории худро аз ташаббусҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷиҳати соли 2025-ро ҳамчун “Соли умумиҷаҳонии ҳифзи пиряхҳо” эълон кардан, иброз дошт.


2021-04-15 17:37:52    39    Муфассал...


ПАГОҲ ИҶЛОСИЯИ ШАШУМИ МАҶЛИСИ МИЛЛИИ МАҶЛИСИ ОЛӢ ДАЪВАТИ ШАШУМ БАРГУЗОР МЕШАВАД. Гузориш дар бораи фаъолияти Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ аз иҷлосияи якум то имрӯз

Пагоҳ дар Душанбе иҷлосияи навбатии шашуми Маҷлиси миллии Маҷлиси Олии Ҷумҳурии Тоҷикистон даъвати шашум баргузор мегардад. Расо як сол пеш, 17 апрели соли 2020 иҷлосияи якуми палатаи болоии Парлумони Тоҷикистон даъвати шашум  бо иштироки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон доир шуда буд, ки дар он 31 нафар аъзои Маҷлиси миллӣ — 25 нафар интихобшуда ва 6 нафар таъингардида иштирок намуданд. Дар он иҷлосия аъзои Маҷлиси миллӣ аз тариқи овоздиҳии пинҳонӣ номзадии муҳтарам ­Рустами Эмомалиро ба вазифаи Раиси Маҷлиси миллии Маҷлиси Олии Ҷумҳурии Тоҷикистон ҷонибдорӣ намуданд, ки ҳамчун муҳимтарин рӯйдоди сиёсии кишвар дар таърихи давлатдории навин нақш хоҳад баст.

Мақомоти олии намояндагӣ ва қонунгузор, хусусан палатаи болоии он, ҳамеша дар маркази таваҷҷуҳи доираҳои сиёсӣ, ҷомеаи шаҳрвандӣ, воситаҳои ахбори омма ва мардуми одӣ қарор дорад. Зеро вазифаи роҳбарии он аз назари конститутсионӣ ҳамчун «мақоми дуюми сиёсии кишвар» эътироф гардидааст.

Таҳлили холисонаи фаъолияти мақомоти мазкур дар раванди кор ва баҳои воқеӣ ба он аз формулаҳои қабулшудаест, ки барои муайян намудани натиҷаҳои минбаъда хидмат мерасонад.

Оид ба натиҷаи фаъолияти яксолаи Маҷлиси миллии Маҷлиси Олии Ҷумҳурии Тоҷикистон, даъвати шашум  ёвари Раиси Маҷлиси миллӣ оид ба робита бо ВАО ва созмонҳои ғайридавлатӣ Наврӯз ҚУРБОНЗОДА  ба АМИТ «Ховар» чунин  маълумоти таҳлилӣ-хронологӣ  пешниҳод намуд:

Натиҷаи фаъолияти яксолаи Маҷлиси миллии Маҷлиси Олии Ҷумҳурии Тоҷикистон даъвати шашум гувоҳи он аст, ки интихоби муҳтарам Рустами Эмомалӣ ҳамчун Раиси Маҷлиси миллии Маҷлиси Олӣ бамаврид ва шоистаи таҳсин аст. Зеро дар ин давра Маҷлиси миллии Маҷлиси Олии Ҷумҳурии Тоҷикистон таҳти сарварии  муҳтарам Рустами Эмомалӣ фаъолиятро дар асоси Конститутсия ва дигар санадҳои меъёрии ҳуқуқии Ҷумҳурии Тоҷикис­тон ба таври шоиста ба роҳ монда, натиҷаҳои назаррасро ба даст овард.

Дар доираи як соли фаъолияти муҳтарам Рустами Эмомалӣ ҳамчун Раиси Маҷлиси миллии Маҷлиси Олии Ҷумҳурии Тоҷикистон муҳимтарин маълумоти таҳлилӣ — хронологиро пешниҳод созем.

                             26 июни соли 2020

Дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ Иҷлосияи дуюми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид, ки дар он ­аъзои Маҷлиси миллӣ 30 масъаларо баррасӣ намуданд.

Тибқи рӯзномаи иҷлосия аъзои Маҷлиси миллӣ як қонуни мукаммал: Қонуни Ҷумҳурии Тоҷикистон «Дар бораи ёрии ҳуқуқӣ» ва як қатор қонунҳои дигарро мавриди баррасӣ қарор дода, ҷонибдорӣ намуданд.

Тибқи пешниҳодҳои Президенти Ҷумҳурии Тоҷикистон, Пешвои миллат муҳтарам Эмомалӣ ­Раҳмон ва бо қарорҳои дахлдори Маҷлиси миллии Маҷлиси Олии Ҷумҳурии Тоҷикис­тон судяҳои Суди Олии Ҷумҳурии Тоҷикистон Вазирзода Гулнора, Қуватзода Турон ва Ҷуразода Насиба аз вазифа бозхонд карда шуда, ба муҳлати нав судяи Суди Олии Ҷумҳурии Тоҷикис­тон интихоб гардиданд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ аз судяҳои навинтихобшуда даъват ба амал оварданд, ки баробари шарафёб гардидан ба боварии Сарвари давлат баҳри таъмини адолати судӣ ва ҳифзи ҳуқуқу озодиҳои инсон ва шаҳрванд содиқона хизмат намоянд.

Ҳамчунин, дар иҷлосия машваратчиёни халқии Суди Олии Ҷумҳурии Тоҷикистон барои солҳои 2020-2025 ва Намояндаи Маҷлиси миллии Маҷлиси Олии Ҷумҳурии Тоҷикистон дар Суди конститутсионии Ҷумҳурии Тоҷикистон интихоб гардиданд.

Дар иҷлосия Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами ­Эмомалӣ суханронӣ намуда, дар назди кумитаҳо, комиссия ва Дастгоҳи Маҷлиси миллӣ вазифаҳои мушаххас гузоштанд.

Аз ҷумла, қайд намуданд: «Маҷлиси миллӣ ҳамчун палатаи болоии мақоми олии намояндагӣ ва қонунгузор иродаи олии мардуми шарифи Тоҷикистонро таҷассум менамояд. Дар марҳалаи нави ҷаҳонишавӣ ва мушкилоти вобаста ба он, инчунин, дар шароити буҳрони шадиди иқтисодиву молиявии ҷаҳонӣ нақшу мақоми Маҷлиси миллӣ ва рисолати ҳар як узви он бояд ҳамқадами замон ва ҷавобгӯи талаботи ҷомеаи шаҳрвандӣ бошад.».

                               5 августи соли 2020

Таҳти раёсати Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ Иҷлосияи сеюми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид.

Зимни он, ки рӯзномааш аз 10 ­масъала иборат буд, аз ҷониби аъзои Маҷлиси миллӣ 4 қонуни мукаммали Ҷумҳурии Тоҷикис­тон «Дар бораи муқовимат ба коррупсия», «Дар бораи сайёҳӣ», «Дар бораи суғуртаи ҳатмии ҷавобгарии гражданию ҳуқуқии соҳибони воситаҳои нақлиёт» ва «Дар бораи фаъолияти баҳодиҳӣ» ҳамаҷониба баррасӣ гардида, ҷонибдорӣ ёфтанд.

                                 6 августи соли 2020

Дар шаҳри Душанбе таҳти раё­сати Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами ­Эмомалӣ Ҷаласаи дуюми якҷояи Маҷлиси миллӣ ва Маҷлиси намо­ян­дагони Маҷлиси Олии Ҷумҳурии Тоҷикистон даъвати шашум баргузор гардид.

Дар он баробари тасдиқи фармонҳои Президенти Ҷумҳурии Тоҷикистон дар бораи аз вазифаи вазири тандурустӣ ва ҳифзи иҷтимоии аҳолии Ҷумҳурии Тоҷикистон озод намудани Олимзода Насим ва дар бораи вазири тандурустӣ ва ҳифзи иҷтимоии аҳолии Ҷумҳурии Тоҷикис­тон таъин намудани Абдуллозода Ҷамолиддин, инчунин, бо қарори якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикис­тон 11 октябри соли 2020 рӯзи интихоботи Президенти Ҷумҳурии Тоҷикистон таъин карда шуд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ изҳор доштанд, ки ин чорабинии муҳими сиёсӣ бояд дар доираи талаботи Конститутсия ва қонунгузории Ҷумҳурии Тоҷикистон, дар сатҳи баланди ташкилӣ, ба таври демократӣ ва озоду шаффоф, бо иштироки фаъолонаи халқи Тоҷикистон ва ҳизбҳои сиёсӣ сурат гирифта, ҳамчун омили муттаҳидкунандаи мардуми кишвар ва таҳкими ваҳдату субот дар ҷомеа хизмат намояд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ аз аъзои Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон даъват ба амал оварданд, ки барои дар сатҳи баланд баргузор гардидани ин маъракаи сиёсӣ саҳмгузор бошанд.

                              11 сентябри соли 2020

Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами Эмомалӣ бо иштироки раиси Суди Олии Ҷумҳурии Тоҷикис­тон Шоҳиён Шермуҳаммад, прокурори генералӣ Раҳмон Юсуф ва роҳбарони дигар сохтору мақомоти дахлдор, аз ҷумла роҳбарони мақомоти ҳифзи ҳуқуқи шаҳри Душанбе, ҷаласаи корӣ доир намуданд.

Зимни он дар қатори дигар масъалаҳо санҷиши муроҷиати хешовандони духтари сесолаи таҷовузшуда аз шаҳри Турсунзода ва дигар ҳодисаҳои ба ин монанд, ки дар шабакаҳои иҷтимоӣ нашр шуда, боиси ба вуҷуд омадани сару садои зиёд гардиданд, мавриди баррасӣ қарор дода шуд.

Дар ҷаласа муҳтарам Рустами Эмомалӣ ба шахсони масъули мақомоти ҳифзи ҳуқуқ, аз ҷумла прокурори генералии Ҷумҳурии Тоҷикистон, супориш доданд, ки таҷрибаи тафтишотӣ-судии парвандаҳои ҷиноятиро ба муқобили озодӣ, обрӯ ва эътибори шахсият, ахлоқ, озодии ҷинсӣ ва дахлнопазирии ҷинсӣ нисбат ба хурдсолон ва ноболиғон, ки дар моддаҳои 138-142 Кодекси ҷиноятии Ҷумҳурии Тоҷикистон пешбинӣ шудаанд, мавриди таҳлил қарор дода, сабабу омилҳои содиршавии чунин ҷиноятҳоро муайян карда, ҷиҳати дар оянда пешгирӣ намудани содиршавии онҳо якҷо бо дигар мақомоти дахлдор чораҳои қатъӣ андешанд.

                               21 сентябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ ҳайати парламентии Олий Маҷлиси Ҷумҳурии ­Ӯзбекистонро таҳти сарварии муовини раиси Палатаи қонунгузории Олий Маҷлиси ин кишвар муҳтарам Улуғбек Иноятов ба ҳузур пазируфтанд.

Дар ҷараёни мулоқот дурнамои муносибатҳои ҳамкорӣ миёни ҷумҳуриҳои Тоҷикистону Ӯзбекис­тон мавриди баррасӣ қарор дода шуд.

Иштирокчиёни вохӯрӣ ба масъалаи рушду инкишофи ҳамкориҳо дар аксар соҳаҳо, бахусус парламентаризм, диққати хос зоҳир намуданд.

                              10 октябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ ҳайати мушоҳидони байналмилалии Ассамблеяи байнипарламентии Иттиҳоди Давлатҳои Мустақилро таҳти сарварии ҳамоҳангсози гурӯҳ, раиси Кумитаи Шӯрои Федератсияи Маҷлиси Федералии Федератсияи Россия оид ба сох­торҳои федералӣ, сиёсати минтақавӣ, худидоракунии маҳаллӣ ва корҳои Шимолӣ  Олег Мелниченко,  ки бо мақсади мушоҳидаи раванди интихоботи Президенти Ҷумҳурии Тоҷикистон ба мамлакат ташриф оварданд, ба ҳузур пазируфтанд.

Иштирокчиёни мулоқот масъалаҳои марбут ба ҳамкориҳои байни Маҷлиси миллии Маҷлиси Олии Ҷумҳурии Тоҷикистон ва  Ассамблеяи байнипарламентии Иттиҳоди Давлатҳои Мустақилро мавриди баррасӣ қарор доданд.

                                 24 ноябри соли 2020 

Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами Эмомалӣ бо сафари расмӣ озими шаҳри Москваи Федератсияи Россия шуданд.

Дар фурудгоҳи «Внуково-2»-и шаҳри Москва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалиро муовини Раиси Шӯрои Федератсияи Маҷлиси Федералии Федератсияи Россия Илёс Умаханов ва дигар шахсони расмӣ самимона истиқбол гирифтанд.

                           24 ноябри соли 2020

Нимаи дуюми рӯз дар шаҳри Москва мулоқоти хосаи Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ ва Раиси Шӯрои Федератсияи Маҷлиси Федералии Федератсияи Россия муҳтарама Валентина Ивановна Матвиенко, инчунин, ҳайатҳои расмии Маҷлиси миллии Маҷлиси Олии Ҷумҳурии Тоҷикистон  ва Шӯрои Федератсияи Маҷлиси Федералии Федератсияи Россия дар қолаби васеъ доир гардиданд.

Муҳтарам Рустами Эмомалӣ муҳимияти баррасии масъалаҳои мубрами ҳамкории стратегии ҳар ду кишварро дар сатҳи роҳбарони мақомоти қонунгузор таъкид намуда, бо қаноатмандӣ изҳор доштанд, ки муносибатҳои дӯстона ва ҳамкории стратегии Тоҷикис­тону Россия ҳоло дар ҳама самт муттасил рушд ёфта, робитаҳои байнипарламентӣ мунтазам ба сатҳи сифатан нав мегузаранд.

 

Аз рӯи натиҷаи мулоқот ҷонибҳо назари некбинонаро аз дурнамои ҳамкории стратегии ҳар ду кишвар таъкид карданд ва изҳори умед намуданд, ки боздиди Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами Эмомалӣ ба Федератсияи Россия ба муносибатҳои бисёрсоҳаи миёни Тоҷикистону Россия неруи тоза бахшида, масъалаҳои бамиёнгузошта мавриди таваҷҷуҳи Шӯрои Федератсия қарор хоҳанд гирифт.

                                   25 ноябри соли 2020

Дар доираи сафари расмӣ ба Федератсияи Россия Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ бо муовини якуми Раиси Думаи давлатии Федератсияи Россия Александр Жуков мулоқот намуданд.

Дар ҷараёни вохӯрӣ дурнамои ҳамкориҳои дуҷонибаи Тоҷикис­тону Россия, бахусус дар самти робитаҳои байнипарламентӣ, мавриди баррасӣ қарор дода шуд.

Ҷонибҳо ба масъалаи таҳкиму густариши ҳамкориҳои мутақобилан судманд дар соҳаҳои тиҷоратӣ-иқтисодӣ, ҷалби сармоя ба иқтисодиёт таваҷҷуҳи хос зоҳир намуданд.

                                 25 ноябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ ва ҳайати ҳамроҳонашон, ҳамчун рамзи эҳтиром ва арҷгузорӣ ба муқаддасоти  миллӣ дар пояи Оромгоҳи «Сарбози номаълум» гулчанбар гузошта, бо лаҳзаи хомӯшӣ хотири шаҳидони ҷангро пос ­доштанд.

 

                               25 ноябри соли 2020

Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами Эмомалӣ дар ҷаласаи Комиссия оид ба ҳамкорӣ байни Маҷлиси миллӣ ва Шӯрои Федератсия иштирок намуданд.

Раиси Маҷлиси миллӣ робитаҳои байнипарламентиро нек арзёбӣ намуда, нақши дипломатияи парламентиро яке аз унсурҳои калидӣ дар таъмиқи ҳамаҷонибаи ҳамкориҳои мутақобила маънидод карданд.

Тавсеаи муносибатҳои анъанавии дӯстона ва ҳамкориҳои мутақобилан судманди Тоҷикистону Россия, на танҳо ифодаи иродаи роҳбарияти олии сиёсии ҳар ду давлат, инчунин, саҳми парламентҳо арзёбӣ гардид.

Ҷонибҳо ба дурнамои ҳамкории Тоҷикистону Россия, ки дорои иқтидорҳои ғанӣ буда, яке аз омилҳои муҳими нигоҳдорӣ ва таҳкими амнияту осоиш дар минтақа мебошад, баҳои баланд доданд.

                              25 ноябри соли 2020

Дар бинои Ҳукумати Федератсияи Россия Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ бо муовини Раиси Ҳукумати Федератсияи Россия, Ҳамраиси Комиссияи байниҳукуматии Тоҷикистону Россия оид ба ҳамкориҳои иқтисодӣ Алексей Оверчук мулоқот ­намуданд.

Муҳтарам Рустами Эмомалӣ ёдовар шуданд, ки асосҳои қарордодиву ҳуқуқии тарафайнро наздики 300 созишномаи байнидавлативу байнисоҳавӣ ташкил медиҳад, ки иҷрои босифати онҳо беҳбудии ҷиддиро тақозо мекунад.

Вобаста ба саноатикунонии иқтисоди кишвар, ки афзалияти стратегӣ эълон шудааст, таъсиси корхонаҳои муштараки истеҳсолӣ, аз ҷумла дар минтақаҳои озоди иқтисодӣ, қобили қабул арзёбӣ гардид.

Дар вохӯрӣ, ҳамчунин, манфиатдор будани ҷонибҳо ба масъалаи содироту воридоти маҳсулоти ғизоӣ ва сабзавоту мева мавриди баррасӣ қарор дода шуд.

Ҳамчунин, Рустами Эмомалӣ аз тезонидани суръати сохтмони 5 муассисаи таълимӣ дар Ҷумҳурии Тоҷикис­тон дар асоси созишномаи тарафайн изҳори назар карданд.

                               25 ноябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ дар ҳошияи сафари расмӣ ба Федератсияи Россия дар бинои Ҳукумати шаҳри Москва бо Раиси шаҳри Москва Сергей Собянин мулоқот карданд.

Маҳаки асосии вохӯриро баррасии маҷмӯи масъалаҳои марбут ба ҳамкориҳои дуҷониба миёни шаҳрҳои Душанбе ва Москва ва муайян намудани самтҳои афзалиятноки робитаҳои минбаъда ташкил дод.

Бо ҳамин нахустин сафари расмии Раиси Маҷлиси миллии Маҷлиси Олии Ҷумҳурии Тоҷикис­тон муҳтарам Рустами Эмомалӣ ба Федератсияи Россия бо натиҷаҳои назаррас ҷамъбаст гардида, дар таҳкиму густариши муносибатҳои дӯстонаи Тоҷикистону Россия саҳифаи нав боз намуд.

                                    27 ноябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ дар ҷаласаи Шӯрои Ассамблеяи байнипарламентии давлатҳои аъзои Иттиҳоди Давлатҳои Мустақил ва ҷаласаи 51-уми пленарии Ассамблеяи байнипарламентии давлатҳои иштирокчии Иттиҳоди Давлатҳои Мустақил, ки дар шакли видеоконференсия сурат гирифт, ширкат варзиданд.

Дар он як силсила масъалаҳо, аз ҷумла интихоби Раиси Шӯрои Ассамблеяи байнипарламентии давлатҳои аъзои Иттиҳоди Давлатҳои Мустақил, нақшаи кории Шӯрои Ассамблеяи байнипарламентии давлатҳои аъзои Иттиҳоди Давлатҳои Мустақил, рушди парламентаризм, робитаҳои байнипарламентӣ, дастгирии қонунгузории тадбирҳо дар кишварҳои узви ИДМ дар робита бо пандемияи COVID-19 ва дигар масъалаҳо мавриди баррасӣ қарор гирифтанд.

                                  30 ноябри соли 2020

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ дар ҷаласаи Шӯрои Ассамблеяи парламентии Созмони аҳдномаи амнияти дастаҷамъӣ ва ҷаласаи 13-уми пленарии он, ки дар шакли видеоконференсия сурат гирифт, иштирок намуданд.

   

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ дар ҷаласаи Ассамблеяи парламентии Созмони аҳдномаи амнияти дастаҷамъӣ суханронӣ намуда, бо дарназардошти раёсати Ҷумҳурии Тоҷикистон дар Созмони аҳдномаи амнияти дастаҷамъӣ дар соли 2021 пешниҳод карданд, ки ҷаласаи навбатии Ассамблеяи парламентии Созмони аҳдномаи амнияти дастаҷамъӣ нимсолаи якуми соли 2021 дар Ҷумҳурии Тоҷикистон доир карда шавад. Иштирокчиёни ҷаласа пешниҳодро якдилона қабул карданд.

                               9 декабри соли 2020

Нимаи дуюми рӯз дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ Иҷлосияи чоруми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид.

Аъзои Маҷлиси миллӣ, тибқи рӯзнома, 38 масъала — қонунҳои конститутсионии Ҷумҳурии Тоҷикис­тон «Оид ба ворид намудани тағйирот ба Қонуни конститутсионии Ҷумҳурии Тоҷикистон «Дар бораи вазъи ҳуқуқии узви Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикис­тон», «Оид ба ворид намудани тағйир ба Қонуни конститутсионии Ҷумҳурии Тоҷикистон «Дар бораи мақомоти прокуратураи Ҷумҳурии Тоҷикистон» ва қонунҳои дигарро ҷонибдорӣ намуданд.

Дар иҷлосия бо пешниҳодҳои Президенти мамлакат бо сабаби ба кори дигар гузаштан судяи Суди конститутсионии Ҷумҳурии Тоҷикистон Ҳошимзода Даврон ва бо сабаби расидан ба синни ниҳоии дар вазифаи судя будан судяҳои Суди Олии Ҷумҳурии Тоҷикистон Раҳматуллозода Бахтулло ва Додихудозода Давлатмо аз вазифа бозхонд карда шуданд.

Инчунин, тибқи пешниҳоди Ҳукумати Ҷумҳурии Тоҷикистон, бо дастгирии аъзои Маҷлиси миллӣ номи деҳоти «Шитхарв»-и ноҳияи Ишкошими Вилояти Мухтори Кӯҳистони Бадахшон ба деҳоти «Вахон» иваз карда шуд.

Ҳамчунин, Раиси Маҷлиси миллии Маҷлиси Олии Ҷумҳурии Тоҷикистон муҳтарам ­Рус­тами Эмомалӣ таваҷҷуҳи аъзои Маҷлиси миллиро ба як қатор масъалаҳои ҳалталаб, ки боис ба муроҷиати зиёди шахсони воқеӣ ва ҳуқуқӣ гардиданд, ҷалб намуданд.

Хусусан, бо таваҷҷуҳ ба натиҷаи таҳлили вазъи бозори дохилӣ ибрози ақида намуданд, ки миёни ширкатҳои давлатӣ, хусусӣ ва хориҷӣ дар соҳаи истеҳсоли мол, иҷрои кор ва хизматрасонӣ рақобати солим ба назар намерасад ва яке аз омилҳои чунин ҳолат камфаъолиятии сохторҳои дахлдор оид ба танзими муносибатҳои бозорӣ ба ҳисоб меравад. Инчунин, ба прокурори генералии Ҷумҳурии Тоҷикистон, директори Агентии назорати давлатии молиявӣ ва мубориза бо коррупсияи ­назди Президенти Ҷумҳурии Тоҷикис­тон ва дигар мақомоти давлатӣ дастур дода шуд, ки фаъолияти сохторҳои дахлдорро ҷиҳати пешгирӣ ва сари вақт ошкор  кардани ҳолатҳои ғасби ғайриқонунии заминҳо ва сохтмони манзили истиқомативу дигар иншоот пурзӯр намоянд.

                                           10 декабри соли 2020

Дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикис­тон муҳтарам ­Рустами Эмомалӣ Ҷаласаи якҷояи чоруми Маҷлиси миллӣ ва Маҷлиси намо­ян­дагони Маҷлиси Олии Ҷумҳурии Тоҷикистон даъвати шашум баргузор гардид.

Тибқи рӯзномаи он аъзои Маҷлиси миллӣ ва вакилони Маҷлиси намояндагони Маҷлиси Олии Ҷумҳурии Тоҷикистон фармонҳои Президенти Ҷумҳурии Тоҷикис­тонро дар бораи озод кардан ва таъин намудани аъзои Ҳукумати Ҷумҳурии Тоҷикистон ҷонибдорӣ карданд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ Сарвазири Ҷумҳурии Тоҷикистон Қоҳир Расулзода, муовини якум ва муовинони ӯ, вазирон ва раисони кумитаҳои давлатии Ҷумҳурии Тоҷикистонро, ки тавассути меҳнати содиқона ва софдилона сазовори боварии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам ­Эмомалӣ Раҳмон гардида, ба мансабҳои олии давлатӣ ва пуршарафу масъулиятнок таъин гардиданд, самимона таб­рик гуфта, дар фаъолияти минбаъдаи онҳо комёбӣ таманно намуданд.

                                   25 январи соли 2021

Таҳти раёсати Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами ­Эмомалӣ Иҷлосияи панҷуми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид.

Аъзои Маҷлиси миллӣ, тибқи рӯзнома, 23 масъала, аз ҷумла, қонунҳои мукаммали Ҷумҳурии Тоҷикис­тон «Дар бораи уҳдадории ҳарбӣ ва хизмати ҳарбӣ», «Дар бораи таъмини амнияти биологӣ ва муҳофизати биологӣ», «Дар бораи тайёр намудани мутахассисон бо назардошти талаботи бозори меҳнат» ва дигар қонунҳоро мавриди баррасӣ қарор дода, ҷонибдорӣ намуданд.

Инчунин, бо пешниҳоди Ҳукумати Ҷумҳурии Тоҷикистон лоиҳаи Қарори Маҷлиси миллии Маҷлиси Олии Ҷумҳурии Тоҷикистон «Оид ба иваз намудани номи ноҳияи Шаҳритузи вилояти Хатлон ба ноҳияи Шаҳритус» баррасӣ гардида, он аз ҷониби аъзои Маҷлиси миллӣ якдилона қабул гардид.

Тибқи пешниҳоди Президенти Ҷумҳурии Тоҷикистон бо қарори Маҷлиси миллии Маҷлиси Олии Ҷумҳурии Тоҷикистон Самадзода Турахон бо сабаби расидан ба синни ниҳоии дар вазифаи судя будан аз вазифаи судяи Суди Олии Ҷумҳурии Тоҷикистон боз­хонд карда шуд.

Ҳамчунин, ҳисоботи прокурори генералии Ҷумҳурии Тоҷикистон «Дар бораи назорати риояи дақиқ ва иҷрои якхелаи қонунҳо дар ҳудуди Ҷумҳурии Тоҷикистон дар соли 2020» шунида шуд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ, бо дарназардошти корҳои анҷомдодаи мақомоти прокуратура ва таҳлили маълумоти омории вазъи ҷинояту ҷинояткорӣ дар соли сипаришуда, аз прокурори генералӣ талаб намуданд, ки назорати прокурориро дар самти пешгирӣ намудани  шомилшавии шаҳрвандони кишвар ба ҳизбу ҳаракатҳои экстремистию террористӣ, таъмини амнияти иттилоотии кишвар пурзӯр карда, ҷиҳати коҳиш додани содиршавии ҷиноятҳои авбошӣ, бахусус авбошии гурӯҳӣ аз ҷониби наврасону ноболиғон бо истифода аз силоҳи сард, ҷиноятҳои коррупсионӣ, бартараф намудани ҳолатҳои сохтакорӣ ва изофанависии ҳисоботи оморӣ дар соҳаи кишоварзӣ чораҳои иловагии қатъӣ амалӣ намояд.

Дастур дода шуд, ки Прокуратураи генералии Ҷумҳурии Тоҷикистон фаъолиятро дар самти назорати риояи дақиқ, иҷрои бечунучаро ва якхелаи қонунҳо, ошкор ва бартараф намудани мухолифати санадҳои меъёрии ҳуқуқӣ, огоҳонӣ, пешгирӣ ва ошкор намудани ҷиноятҳои марбут ба савдои одамон, муомилоти ғайриқонунии воситаҳои нашъадор, аз байн бурдани шиканҷа, муносибатҳои бераҳмона ва дигар кирдорҳои таҳқиркунандаи шаъну шарафи инсон дар рафти таҳқиқу тафтиши пешакӣ, тавқифгоҳҳои нигоҳдории муваққатию тафтишотӣ ва муассисаҳои иҷрои ҷазои ҷиноятӣ, таъмини риояи қонунгузорӣ дар соҳаҳои иқтисодиёт, бахусус ҳимояи ҳуқуқи истеъмолкунандагон ва дастгирии давлатии соҳибкорӣ, раванди муҳоҷират ва ҳифзи сиҳатии мардум, пешгирии ҷинояту дигар ҳуқуқвайронкуниҳо дар байни ноболиғон, баррасии пурра ва ҳамаҷонибаи муроҷиатҳои шахсони воқеиву ҳуқуқӣ тақвият бахшанд.

Муҳтарам Рустами Эмомалӣ аз аъзои Маҷлиси миллии Маҷлиси Олии Ҷумҳурии Тоҷикистон даъват ба амал оварданд, ки дар баробари пешбурди корҳои фаҳмондадиҳӣ, тарғибу ташвиқи сиёсати давлатӣ, шарҳу тавзеҳ ва амалигардонии қонунҳои қабулшуда, ҷиҳати амалисозии ташаб­бусҳои созанда ва нақшаҳои ватандӯс­тона дар роҳи ободу зебогардонии кишвар ба истиқболи ҷашни арзандаи 30 — солагии Истиқлолияти давлатии Ҷумҳурии Тоҷикистон азму талоши бештар равона намоянд.

                                        17 марти соли 2021

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ бо Сафири фавқулода ва мухтори Франсия дар Ҷумҳурии Тоҷикистон Мишел Тарран мулоқот анҷом доданд.

Зимни он, бо дарназардошти таърихи бисёрсолаи муносибатҳои ҳасанаи ҳар ду кишвар, таъкид гардид, ки Ҷумҳурии Тоҷикистон ба масъалаи рушди ҳамкории бисёрҷониба бо Ҷумҳурии Франсия ҳамеша таваҷҷуҳи хоса зоҳир карда, тавсеаи муносибатҳоро бо ин кишвар аз афзалиятҳои асосии сиёсати хориҷӣ меҳисобад.

Дар баробари дигар соҳаҳо, инчунин, рушди робитаҳои байнипарламентии ҷавобгӯи талаботи муосир ҳамчун яке аз василаҳои самараноки рушди ҳамкории дуҷониба арзёбӣ ва зарурати фаъолгардонии робитаҳо миёни гурӯҳҳои дӯстӣ ва ҳамкории байни Маҷлиси миллии Маҷлиси Олии Ҷумҳурии Тоҷикистон ва Сенати Ҷумҳурии Франсия таъкид карда шуд.

                                   17 марти соли 2021

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ сафири фавқулода ва мухтори Федератсияи Россия дар Ҷумҳурии Тоҷикистон Сергей Лякин-Фроловро бо хоҳиши ӯ ба ҳузур пазируфтанд.

Зимни мулоқот ҷонибҳо вазъ ва дурнамои муносибатҳои дуҷониба, аз ҷумла дар самти робитаҳои байнипарламентиро баррасӣ карда, дар марҳилаи муосир нақши дипломатияи парламентиро ҳамчун унсури калидии ҳамкории байнидавлатӣ арзёбӣ намуданд.

Дар ин ҷода аҳамияти муассири ҳамкорӣ дар чаҳорчӯбаи сиғаҳои нодиру самараноки бисёрҷониба, пеш аз ҳама, Ассамблеяи байнипарламентии давлатҳои аъзои Иттиҳоди Давлатҳои Мустақил ва Ассамблеяи парламентии Созмони аҳдномаи амнияти дастаҷамъӣ ва саҳми муҳими онҳо дар рушди фазои ҳуқуқӣ таъкид гардид.

                                     1 апрели соли 2021

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ бо Раиси Маҷлиси миллии Ҷумҳурии Корея муҳтарам Пак Бён Сок, ки бо сафари расмӣ  ба Ҷумҳурии Тоҷикистон ташриф овард, ­мулоқот намуданд.

Дар мулоқот таъкид гардид, ки тақвияти робитаҳои байнипарламентӣ василаи самараноки рушди ҳамкории дуҷонибаи ҷавобгӯ ба манфиати миллии ҷонибҳо буда, дар марҳилаи кунунӣ фаъолгардонии гурӯҳҳои дӯстӣ ва ҳамкории Маҷлиси миллии Маҷлиси Олии Ҷумҳурии Тоҷикистон ва Маҷлиси миллии Ҷумҳурии Корея ба мақсад мувофиқ аст.

                                     16 апрели соли 2021

Раиси Маҷлиси миллии Маҷлиси Олии Ҷумҳурии Тоҷикис­тон муҳтарам ­Рустами Эмомалӣ Иҷлосияи шашуми Маҷлиси миллии Маҷлиси Олии Ҷумҳурии Тоҷикис­тон даъвати шашумро даъват намудаанд, ки дар он баррасии қонунҳои Ҷумҳурии Тоҷикистон «Дар бораи мақомоти адлияи Ҷумҳурии Тоҷикистон», «Дар бораи Академияи миллии илмҳои Тоҷикистон» ва дигар қонунҳои қабулнамудаи Маҷлиси намояндагон, инчунин, масъалаҳои тағйир додани сарҳади ноҳияҳои Шоҳмансур, Фирдавсӣ, Сино ва Исмоили Сомонии шаҳри Душанбе ва иваз намудани номи баъзе аз маҳалҳои аҳолинишини кишвар дар назар дошта шудааст.

Тавре аз маълумоти хронологӣ бармеояд, дар як давраи кӯтоҳ муҳтарам Рустами Эмомалӣ ҳамчун роҳбари оқилу кордон тамоми иқтидор ва ­ҳастиро баҳри амалисозии сиёсати Асосгузори сулҳу ваҳдати миллӣ — Пешвои миллат, Президенти мамлакат муҳтарам Эмомалӣ Раҳмон дар ҳама самти инкишоф, пеш аз ҳама, такмили қонунгузории мамлакат, татбиқи самараноки қонунҳои амалкунанда ва роҳандозӣ кардани ҳуқуқи ташаббуси қонунгузорӣ равона намуда, робитаҳои байнипарламентиро бо кишварҳои дуру наздик таҳкиму тавсеа бахшида, палатаи болоии парламенти мамлакатро дар арсаи ҷаҳонӣ муаррифӣ намуданд, ки аз ҷониби ҷомеа ҷонибдории амиқ ёфт.

 


2021-04-15 16:21:25    29    Муфассал...


САНОАТ — МУҲАРРИКИ АСОСИИ ИҚТИСОДИЁТ. Тоҷикистон дорои заминаҳои воқеии рушди саноат аст, ки барои пешрафти истеҳсолоти миллӣ шароити мусоид фароҳам меорад

Саноат яке аз соҳаҳои калидии иқтисоди мамлакатҳо ва тавлидкунандаи асосии неъматҳои моддӣ ба ҳисоб рафта, рушди он ба пешрафти бахшҳои дигари иқтисодиёт заминаи мусоид мегузорад ва нуфузу мавқеи давлатро дар арсаи байналмилалӣ устувор менамояд. Бо дарназардошти аҳамияти соҳаи саноат дар ҳалли масъалаҳои иқтисодиву иҷтимоӣ ва таъсиси ҷойҳои корӣ 26 декабри соли 2018 Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатии худ ба Маҷлиси Олии мамлакат саноатикунонии босуръати кишварро ҳадафи чоруми миллӣ эълон карданд.

Роҳбари Котиботи Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ Нуъмон АБДУҒАФФОРЗОДА доир ба рушди соҳаи саноат ва саҳми он дар рушди иқтисоди миллӣ  дар суҳбат бо АМИТ «Ховар» чунин ибрози андеша намуд:

 Истеҳсолоти саноатӣ назар ба дигар соҳаҳои иқтисод, аз ҷумла кишоварзӣ тадриҷан рушд намуда, саҳми он дар таъмини шуғли аҳолӣ, содироти маҳсулот, афзоиши Маҷмӯи маҳсулоти дохилӣ ва дар маҷмӯъ рушди иқтисодии кишварҳо нақши бузург пайдо кардааст. Марҳилаҳои аввали ташаккули соҳаҳои саноат асосан ба давлатҳои ИМА ва Аврупои ғарбӣ рост омада, дар натиҷаи аз доираҳои миллӣ берун омадани истеҳсолоти саноатии ин мамлакатҳо рушди он дар дигар кишварҳо низ шурўъ шуд.

Ҷумҳурии Тоҷикистон дорои заминаҳои воқеии рушди саноат, аз ҷумла захираҳои бойи табиӣ, қувваи корӣ, манбаҳои кофии энергияи сабз, мавқеи мусоиди ҷуғрофӣ, мавҷудияти бозорҳои дохиливу хориҷӣ, иқлими мусоид барои истеҳсоли маҳсулоти кишоварзӣ ва дигар омилҳои пешбарандаи истеҳсолоти саноатӣ аст, ки барои тараққиёти босуръати тамоми бахшҳои он, бахусус саноати маъдан ва металлургия, мошинсозӣ, истеҳсоли масолеҳи сохтмон, саноати сабук, хӯрокворӣ, дорусозиву кимиё ва дар ин замина ба рушди истеҳсолоти миллӣ шароити мусоид фароҳам меорад.

Барои рушди соҳаи саноат якчанд барномаву стратегия ва нақшаи чорабиниҳо, аз ҷумла Стратегияи рушди саноат дар Ҷумҳурии Тоҷикистон барои давраи то соли 2030, Барномаи рушди металлургияи ранга ва сиёҳ дар Ҷумҳурии Тоҷикистон барои давраи то соли 2025, Барномаи рушди саноати сабук дар Ҷумҳурии Тоҷикистон барои давраи то соли 2022, Барномаи рушди соҳаи кирмакпарварӣ ва коркарди пилла дар Ҷумҳурии Тоҷикистон барои солҳои 2012-2020 ва Барномаи рушди қолинбофӣ дар Ҷумҳурии Тоҷикистон барои солҳои 2014-2020, Барномаи саноатикунонии босуръати Ҷумҳурии Тоҷикистон барои солҳои 2020-2025 қабул гардиданд. Санадҳои мазкур ба афзун намудани ҳаҷми маҳсулот, таъмини рақобатнокии он, ташкили корхона ва коргоҳҳои нав, таъсиси ҷойҳои корӣ ва гузариши иқтисодиёти кишвар аз шакли тавлидкунандаи ашёи хом ба истеҳсолкунандаи маҳсулоти ниҳоӣ бо арзиши иловашудаи баланд замина мегузорад.

Дар натиҷаи тадбирҳои амалигардида саҳми соҳаи саноат дар Маҷмӯи Маҳсулоти Дохилӣ аз 12,1 фоизи соли 2014 ба 17,4 фоиз дар соли 2020 расонида шуд.

Рушди саноат ва истеҳсолоти миллӣ бо истифодаи ашёи хоми ватанӣ метавонад ба таъсиси корхонаҳои истеҳсолӣ, ташкили ҷойҳои нави корӣ, гардиши дохилии молу маҳсулот, устувории низоми иқтисодӣ ва дар маҷмӯъ ба таъмини зиндагии шоистаи аҳолӣ мусоидат намояд.

Вобаста ба ин, бахши коркарди ашёи хом ва то маҳсулоти ниҳоӣ расонидани он дар ҳамаи бахшҳои соҳаи саноати мамлакат яке аз масъалаҳои муҳим ба шумор рафта, дар ин самт чораҳои зарурӣ амалӣ шуда истодаанд.

Зарур аст, ки захираҳои дохилӣ — ашёи хоми мавҷуда то ба маҳсулоти истеъмолӣ расонида шуда, давра ба давра талаботи дохилӣ аз ҳисоби сарчашмаҳои худӣ таъмин карда шавад. Ин тадбир дар баробари пешгирии хуруҷи асъори хориҷӣ давлати воридкунандаро бомаром ба давлати содиркунандаи маҳсулоти ниҳоӣ табдил дода, инчунин вобастагии мамлкатро аз таъсири омилҳои беруна коҳиш медиҳад. Дар сурати ноустуворӣ дар бозорҳои беруна, муътадилии низоми иқтисодӣ, аз ҷумла нархҳои маҳсулоти асосӣ дар бозори дохилӣ нигоҳ дошта мешавад.

Тоҷикистон дар заминаи рушди саноати ватанӣ ҳадафҳои стратегии худро татбиқ намуда, Ҳукумати мамлакат тавассути сиёсати самараноки саноатӣ, сармоягузорони дохилӣ ва хориҷиро ҷалб менамояд ва захираҳои дохилии худро барои баланд бардоштани сатҳи некуаҳволии аҳолии кишвар бомаром истифода намуда истодааст.

Таъмини рушди босуръати саноат ба иқтисодиёти ҷумҳурӣ якчанд манфиатҳои иҷтимоию иқтисодӣ дошта, илова ба миқёси воқеии даромад, гарчанде ин омили назаррас аст, рушди саноат дигар афзалиятро доро мебошад. Аз ҷумла, гардиши молию пулии корхонаҳо ва талаботи онҳоро ба асъори миллӣ зиёд карда, барои устувор нигоҳ доштани қурби асъори миллӣ шароит фароҳам меорад; ба устувор гардидани эътимод ба низоми бонкии мамлакат, афзоиши депозитҳо дар бонкҳо, кам шудани талабот ба асъори хориҷӣ ва рушди бозори такрории коғазҳои қиматнок ва биржаҳои фондӣ замина мегузорад; имконияти содиротии мамлакатро васеъ намуда, воридоти бештари асъори хориҷиро ба иқтисодиёти миллӣ таъмин менамояд.

Рушди саноат ва муваффақ шудан ба қонеъгардонии талаботи бозори ҷаҳонӣ симои мамлакатро дар арсаи байналмилалӣ ба таври мусбат инъикос намуда, ҳар давлат бо моли истеҳсолкардааш муаррифӣ карда мешавад. Соҳаи саноат на фақат ҳамчун сарчашмаи даромад хизмат менамояд, инчунин имкониятро барои таҳкими ҷанбаҳои дигари ҳаёти иқтисодию иҷтимоии кишвар, аз ҷумла ташкили ҷойҳои кории нав, баланд намудани ҳисси ифтихори миллӣ, устувории иқтисодӣ ва густариши муносибатҳои байналмилалии иқтисодӣ фароҳам меорад.

Қобили зикр аст, ки яке аз бахшҳои муҳим саноати сабук ба ҳисоб рафта, он дар иқтисодиёти ҷаҳон саҳми муассир дорад ва дар корхонаҳои нассоҷӣ дар ҷаҳон беш аз 60 миллион кормандон фаъолият мекунанд. Дар Чин саноати сабук 19%-и ММД-ро ташкил медиҳад. Ин танҳо 2% камтар аз даромади соҳаи кишоварзӣ ва нисфи ҳиссаи умумии саноати коркард мебошад.

Саноати сабук инчунин ҳиссаи назарраси ММД-ро дар иқтисодиёти чунин кишварҳо, ба монанди Португалия-22%, Италия-12%, Германия-6%, ИМА-4% ишғол мекунад. Бо назардошти андозаи иқтисодиёти ин кишварҳо метавон гуфт, ки саноати сабук дар ММД ва шуғли умумии аҳолии қобили меҳнат саҳми назаррас дорад.

Бозори ҷаҳонии саноати бофандагӣ ва дӯзандагӣ дар соли 2019 арзиши бозори чаканаи 1.9 триллион доллари амрикоиро ташкил дод ва пешбинӣ шудааст, ки соли 2030 ба 3,3 триллион доллар расад ва бо суръати рушди солонаи 3,5% афзоиш меёбад.

Саноати ҷаҳонии нассоҷӣ тайи чанд соли охир ба яке аз соҳаҳои муҳим табдил ёфта, дар рушди иқтисодӣ саҳми назаррас дорад. Азбаски истеҳсоли нассоҷӣ як соҳаи меҳнатталаб аст, кишварҳои рӯ ба тараққӣ қодиранд, ки изофаи қувваи кории худро барои ворид шудан ба бозор ва оғози раванди бунёди иқтисоди саноатӣ истифода баранд.

Содироти нассоҷӣ ва либос дар якчанд кишварҳо ҳиссаи муҳими содиротро ташкил медиҳад: 85% дар Бангладеш, 59% дар Покистон, 12% дар Туркия ва 11% дар Миср. Ин бахши меҳнатталаб миллионҳо нафарро бо кор таъмин мекунад ва ҳиссаи шуғл дар ин бахш дар шумораи умумии неруи корӣ дар кишварҳои рӯ ба тараққӣ назаррас аст.

Дар ҷумҳурии мо низ саноати сабук яке аз соҳаҳои ояндадору таҳкимбахшандаи иқтисодиёт ба шумор меравад. Зеро дар ҷумҳурӣ заминаҳои устувори рушди ин соҳа мавҷуд буда, имкони истифодаи пурраи захираҳои ашёи хом ва истеҳсоли моли ҷавобгӯ ба талаботи замони муосир фароҳам оварда шуда истодааст.

Мутобиқи нишондиҳандаҳои омории соли 2020, шумораи корхонаю коргоҳҳои соҳаи саноати сабук қариб 490 корхонаро ташкил дода, ҳиссаи соҳа дар маҷмӯи шумораи корхонаҳои саноатӣ якҷо бо корхонаҳои хурд зиёда аз 21 фоизро ташкил медиҳад.

Бо ташаббус ва дастгириҳои пайвастаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати мамлакат ба рушди соҳаи саноат, аз ҷумла саноати сабук имтиёзҳои назаррас, ба монанди озод намудан аз супоридани андоз аз фоида вобаста ба ҳаҷми сармоягузориҳо аз 2 то 5 сол, озод намудан аз АИИ ва боҷи гумрукӣ барои воридоти дастгоҳҳо ва таҷҳизоти технологӣ, ашёи хом барои истеҳсолот, ки дар ҷумҳурӣ истеҳсол карда намешавад, ба муддати 12 сол аз андози фоида, андози замин ва андози моликият озод кардани корхонаҳои нави коркади нахи пахта то маҳсулоти тайёр дар сурати бунёди занҷираи пурраи коркарди нахи пахта ва дигар имтиёзҳо фароҳам оварда шуда, фазои муосиди сармоягузорӣ муҳайё гардидааст. Тибқи қонунгузории мамлакат соҳибкорону сармоягузорони дохиливу хориҷӣ аз лиҳози ҳуқуқӣ имтиёзҳои якранг доранд.

Барои ба даст овардани нишондиҳандаҳои иқтисодӣ, ки рақобати муваффақро дар бозори ҷаҳонӣ фароҳам меоранд, суръати истеҳсоли маҳсулоти саноати сабук дар ҷумҳурӣ ба таври назаррас афзоиш дода мешавад.

Маҳсулоти соҳаи саноати сабук, аз ҷумла маҳсулоти нассоҷию дӯзандагӣ, аз қабили риштаи пахтагин, матои пахтагини хом ва тайёр, маҳсулоти кешбофӣ, ҷӯробҳо, либосҳои тайёри дӯхташуда ба якчанд  кишварҳои хориҷи дуру наздик содирот шуда истодаанд.

Дар баробари ин, бо мақсади таъмини рушди саноати сабук, амалӣ намудани якчанд тадбирҳои маҷмӯӣ, аз ҷумла ҷиҳозонидани корхонаҳои амалкунанда бо таҷҳизоти технологии муосир, тақвият бахшидани бахшҳои пахтакорӣ, пиллапарварӣ ва чорводорӣ бо мақсади таъмини корхонаҳои ватанӣ бо ашёи хом; мутобиқ намудани сифати маҳсулот ба талабот ва табъи мизоҷон, мусоид намудани арзиши маҳсулоти ниҳоӣ, ташкили брендҳои нав ва бандубаст, таъмини корхонаҳо бо мутахассисони баландихтисоси муҳандисӣ ва коргарони ихтисосҳои асосӣ, мунтазам баланд бардоштани малакаи касбӣ, васеънамоии дастрасӣ ба маблағгузорӣ барои пурра намудани фондҳои гардишӣ, ташкили кластерҳои агросаноатӣ бо занҷираи арзиши иловашудаи баланд, пайдо намудани бозорҳои нави ҷаҳонӣ ва густариши ҳамкорӣ бо корхонаҳои асосии саноати сабук дар кишварҳои дар ин соҳа пешрафта ҷиҳати қабули фармоиш барои истеҳсоли маҳсулоти ниҳоӣ муҳим арзёбӣ мегардад.

Соҳаи дигари муҳим саноати хӯрокворӣ маҳсуб ёфта, бунёди корхонаҳои саноати коркарди маҳсулоти кишоварзӣ ва истеҳсоли маводи хўрока дар Ҷумҳурии Тоҷикистон дар солҳои соҳибистиқлолӣ, махсусан аз солҳои 2000-ум то имрўз ба натиҷаҳои назаррас ноил гардид. Соҳибкорон аввалин шуда, ба бунёди корхонаҳои истеҳсоли маҳсулоти хўрока машғул шуданд.

Миқдори корхонаҳо дар ҳама соҳаҳои саноати хўрокворӣ соли 2020-ум ба зиёда аз 520 адад расонида шуда, ҳиссаи саноати хўрокворӣ дар таркиби маҷмӯи умумии маҳсулоти саноатии мамлакат қариб  23 фоиз ва дар ҳаҷми саноати коркард зиёда аз 37 фоизро ташкил дод.

Дар аксари корхонаҳо технологияи муосири коркард ҷорӣ гардида, бастабандии маҳсулот ба таври муосир роҳандозӣ гардид. Мутахассисони соҳа барои боз ҳам баланд намудани сифати маҳсулот корҳои зиёдеро ба анҷом расонида истодаанд.

Дар баробари ин, то ҳол якчанд навъҳои маҳсулоти хўрокворӣ аз дигар кишварҳо ворид гардида, дар ҳама соҳаҳои саноати хўрокворӣ истифодаи самараноки иқтидорҳои истеҳсолӣ муҳим аст.

Зеро саноати хўрокворӣ ва коркарди маҳсулоти кишоварзӣ дар рушди саноати ҷумҳурӣ саҳми калон дошта, рушди минбаъдаи он метавонад ба иҷрои ҳадафи стратегии таъмини амнияти озуқаворӣ ва ғизои босифат такони ҷиддӣ бахшад.

Барои таъмини рақобатпазирии маҳсулоти хўроквории истеҳсоли корхонаҳои ватанӣ шароити мусоид, аз қабили иқлими муътадил ва аз ҷиҳати экологӣ тоза барои парвариши маҳсулоти кишоварзӣ, сифати баланди таъму лаззати маҳсулот, мавҷудияти бозорҳои дохиливу беруна ва қувваи кории ихтисоснок фароҳам аст.

Дар баробари ин, амалисозии якчанд тадбирҳо, ба монанди роҳандозии нақшаҳои тадқиқоти маркетингӣ; истеҳсоли маҳсулоти воридотивазкунанда, тақвият бахшидани ҷоринамоии технологияҳои нав барои истеҳсоли маҳсулот, тарғибу ташвиқи васеи тамғаи молӣ, аз ҷумла коркарди сомонаҳои корпоративӣ ва ҷойгир кардани онҳо дар шабакаҳои интернетӣ, истифодаи васеи шабакаҳои иҷимоӣ, ташкил кардани намоишгоҳҳо ва ё иштирок дар онҳо, ташкили кластерҳои агросаноатӣ ва дигар чораҳо зарур аст.

Илова ба ин, барои рушди минбаъдаи саноати хўрокворӣ дар Тоҷикистон корҳои зеринро дар ду марҳила амалӣ намудан ба мақсад мувофиқ аст.

Марҳилаи якум дар асоси шартномаҳои муфиди тарафайн ба роҳ мондани ҳамкорӣ байни корхонаҳое, ки фаъолияташон аз истеҳсоли маҳсулоти кишоварзӣ вобастагӣ дорад (меваю сабзавот, гӯшт, шир, гандум ва ғайраҳо) ва хоҷагиҳои кишоварзиро фаро мегирад. Дар баробари ин, саҳмгузории корхонаҳои саноатӣ дар парвариши маҳсулоти кишоварзии худӣ дар хоҷагиҳои ёрирасони корхонаҳо, идомаи амалисозии чорабиниҳо ҷиҳати боз ҳам беҳтар намудани борҷомакунӣ ва бандубасти маҳсулот, бунёди корхонаҳои хурди меваю сабзавот, гиёҳҳои табобатӣ, коркарди шир ва гӯшт, ғалладонагиҳо ва зироати равғанидиҳанда дар минтақаҳои дурдасти ҷумҳурӣ дар заминаи ашёи хоми маҳаллӣ муҳим арзёбӣ мегардад.

Марҳилаи дуюм, ки марҳилаи ҳалкунандаи рушди соҳаҳои саноати хўрокворӣ ба шумор меравад, тадбирҳои зерин, аз ҷумла пурра иваз намудани технология ва дастгоҳҳои кӯҳнаи корхонаҳои фаъолияткунанда ба технологияи нави муосир (модернизатсияи истеҳсолот), ташкили кластерҳои агросаноатӣ ва таъмини эҳтиёҷот бо ашёи худӣ (локализатсия), паст кардани тамоюлҳои истеҳсолоти мавсимӣ бо роҳи истифодаи технологияҳои нав, ба истеҳсолот ворид намудани навъҳои гуногуни ашёи хом ва инкишофи инфрасохтори истеҳсолот, ҳавасмандгардонии соҳибкорон нисбат ба афзоиши иқтидорҳои нав ва дигар чораҳои заруриро фарогир аст.

Дар маҷмӯъ, пешравии ояндаи саноати хўрокворӣ бе тараққӣ додани заминаи ашёи хоми кишоварзӣ имконнопазир аст. Афзоиши ҳаҷми маҳсулоти кишоварзӣ ба зиёд гардидани миқдори корхонаҳои саноати хӯрокворӣ мусоидат намуда, фаъолияти муназзами корхонаҳоро давоми сол таъмин менамояд.

Дар ҳама давру замон ҳаёти инсонро бунёдкориву созандагӣ, сохтмони роҳҳою нақбҳо, биноҳои маъмурию манзилӣ ҳамроҳӣ менамоянд. Заминаи амалӣ намудани ҳамаи он ободкориҳо рушди истеҳсоли масолеҳи сохтмонӣ ба ҳисоб меравад. Имрўз аҳамияти ин соҳа дар рушди иқтисодиёти Тоҷикистон аз ҳарвақта дида муҳимтар мебошад.

Саноати масолеҳи сохтмонӣ тибқи нақшаву барномаҳои соҳавӣ рушд ёфта, барои расидан ба ҳадафҳои стратегии давлат мусоидат намуда истодааст.

Аз ин рў, дар як муддати начандон тўлонӣ, шумораи корхонаҳои саноати масолеҳи сохтмонӣ аз сӣ адади соли 2004 ба 530 корхона дар соли 2020 расонида шуд, инчунин садҳо соҳибкорони инфиродӣ ба истеҳсоли масолеҳи сохтмонӣ машғул шуданд.

Солҳои охир дар соҳа истеҳсоли маҳсулоти нави воридотивазкунанда ва ба содирот нигаронидашуда, аз ҷумла семент, пахтаи минералӣ аз санг, рангҳои аккрилӣ, қубурҳои пластикӣ, хишти ороишӣ, шиферҳои гуногун, сангҳои ороишӣ ва ғайра густариш ёфт.

Тибқи таҳлилҳо, талабот ба масолеҳи сохтмонӣ дар ҷумҳурӣ ҳамасола афзоиш ёфта, таъмини он дар заминаи рушди соҳаи масолеҳи сохтмонӣ ва истифодаи васеи ашёи хоми ватанӣ имконпазир аст.

Бо мақади идомаи ислоҳот ва ба таври назаррас баланд бардоштани саҳми бахшҳои саноат дар рушди иқтисодию иҷтимоии мамлакат дар ҷаласаи ХХ Шўрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ Раиси Шўрои машваратӣ, Пешвои муаззами миллат, Президенти мамлакат муҳтарам Эмомалӣ Раҳмон вобаста ба таҳлили вазъи соҳаи саноати кишвар ва муайян намудани имконияти нави баланд бардоштани иқтидорҳои соҳа ва таҳияи тавсияҳои мушаххас супориш доданд.

Дар ин замина, дар бахшҳои заминаи меъёрии ҳуқуқии соҳаи саноат, рушди бахши нассоҷӣ ва дӯзандагӣ, истеҳсоли масолеҳи сохтмон, саноати хўрокворӣ ва коркарди маҳсулоти кишоварзӣ, рушди саноати маъдан ва коркарди захираҳои табиӣ, коркарди алюминий, ҷорӣ намудани меъёрҳои байналмилалии сифат ва идоракунии корпоративӣ ва дигар ҷанбаҳои бахши саноат таҳлили ҳамаҷониба гузаронида шуда, натиҷаҳои он дар ҷаласаи XXI Шӯрои машваратӣ 25 феврали соли 2021 баррасӣ карда шуданд.

Тибқи баррасии масъалаҳо ва натиҷаҳои ҷаласа, вобаста ба якчанд  масъалаҳои муҳими таъмини рушди соҳаи саноат, аз ҷумла таҳияи лоиҳаҳои Нақшаи чорабиниҳо оид ба ҷолибгардонии фазои сармоягузорӣ дар соҳаи саноат, Қонуни Ҷумҳурии Тоҷикистон “Дар бораи паркҳои технологӣ” дар таҳрири нав бо назардошти таъсиси паркҳои технологияҳои иттилоотӣ (IT Park), Қонуни Ҷумҳурии Тоҷикистон “Дар бораи тиҷоратикунонии натиҷаҳои фаъолияти илмӣ ва илмию техникӣ”, бо роҳандозии васеи инноватсия дар истеҳолот, татбиқи пурра ва саривақтии Қонуни Ҷумҳурии Тоҷикистон “Дар бораи сиёсати давлатӣ дар соҳаи саноат”, баланд бардоштани суръати афзоиш ва васеъгардонии истеҳсолоти саноатӣ, рушди кооператсияи истеҳсолӣ, истифодаи самараноки бартариятҳои минтақавии соҳаи саноат, тақвияти истеҳсоли маҳсулоти рақобатноки ба содирот нигаронидашуда ва ивазкунандаи воридот, азнавтаҷҳизонии истеҳсолоти амалкунанда ва таъсиси кластерҳои истеҳсолӣ, таъсиси корхонаҳои нави соҳа ва таҷдиди корхонаҳои амалкунанда бо ҷалби сармояи ватанию хориҷӣ, истифодаи стандартҳои байналмиллии сифат, истифодаи васеи низоми идоракунии корпоративӣ, стандартҳои байналмилалии муҳосиботу ҳисобдорӣ, истифодаи неруи барқ дар ҷараёни истеҳсолӣ, такмил додани барномаҳои таълимии муассисаҳои таҳсилоти олӣ ва миёнаи касбӣ дар асоси талабот ва эҳтиёҷоти бозори меҳнат, густариши ҳамкориҳо бо созмонҳои байналмилалии соҳавӣ, аз ҷумла Ташкилоти СММ оид ба рушди саноат ва дигар самтҳои соҳаи саноат қарорҳои дахлдор қабул гардиданд.

Бо итминон метавон изҳор намуд, ки амалишавии қарорҳои қабулнамудаи ҷаласаи XXI Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ ба рушди босуръати соҳаи саноат такони нав мебахшад.

ДАР АКС: Президенти мамлакат муҳтарам Эмомалӣ Раҳмон зимни ифтитоҳи корхонаи «Ресандаи Тоҷикистон» дар шаҳри Хуҷанд 20 октябри соли 2015. Акс:Хадамоти матбуоти Президенти ҶТ/АМИТ «Ховар»


2021-04-15 15:05:05    9    Муфассал...


Муаррифӣ ва эътирофи фарҳанги тоҷик аз ҷониби ҷаҳониён барои ҳар сокини Тоҷикистон ифтихор аст. Эҳдо ба Рӯзи байналмилалии фарҳанг

Аз ҷониби ҷомеаи ҷаҳонӣ эътироф гардидани мероси таърихиву фарҳангии мо дар айни замон эътирофи тоҷикон ҳамчун миллати тамаддунсозу фарҳангӣ мебошад… Моро зарур аст, ки ёдгориҳои таърихии худро ҳифз кунем, обод гардонем ва ба онҳо ҳамчун ҷузъи таркибии сарнавишти миллати куҳанбунёдамон муносибат намоем.

Ин нуктаро Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми худ ба Маҷлиси Олии Ҷумҳурии Тоҷикистон 26 декабри соли 2018 дар самти эҳёи таъриху фарҳанги миллати тоҷик  таъкид  доштанд. Имрӯз, ки дар саросари ҷаҳон  Рӯзи байналмилалии фарҳангро таҷлил менамоянд, ёдоварӣ аз  ин суханони пурҳикмати Пешвои миллат басо муфид ва бомаврид  аст.

Ҳамасола 15 апрел дар ҷаҳон  Рӯзи байналмилалии фарҳанг таҷлил карда мешавад, ки ба  санаи   дар Вашингтон ба имзо  расидани  шартнома «оид ба ҳифзи муассисаҳои илмию бадеӣ ва осори таърихӣ» алоқаманд аст.

Дар ин робита хабарнигори АМИТ «Ховар» бо  котиби масъули Комиссияи миллӣ оид ба корҳои ЮНЕСКО Зулфия Бурҳон доир  ба аз ҷониби ҷомеаи ҷаҳонӣ эътироф гардидани осори фарҳангиву таърихии миллати тоҷик суҳбат намуд.

Мавсуф иброз дошт, ки  осори мероси таърихию фарҳангии миллати тоҷик маҳсули тафаккур ва эҷоди ин миллати тамаддунофар буда, онҳо давраҳои гуногуни ҳаёти ҷамъиятии ниёгонамонро  аз давраҳои антиқа то имрӯз дар шаклҳои бошишгоҳ, маъбадҳо, қасру қалъа, мақбара, мадорис ва дигар шакли хоси фарҳанги мероси ғайриманқули миллӣ таҷассум менамоянд.
Зулфия Бурҳон иттилоъ дод, ки 6 апрели соли 1993 Ҷумҳурии Тоҷикистон ҳамчун узви комилҳуқуқи Созмони байналмилалии ЮНЕСКО расман аз ҷониби ҷомеаи ҷаҳонӣ эътироф гардида, ҳамон сол Комиссияи миллии Ҷумҳурии Тоҷикистон оид ба корҳои ЮНЕСКО дар назди Вазорати корҳои хориҷӣ таъсис дода шуд.

«Ҷумҳурии Тоҷикистон сол то сол ҳамкории худро бо ЮНЕСКО инкишоф дода, дар соҳаҳои гуногуни  ҳаёти ҷамъиятӣ лоиҳа ва барномаҳоро амалӣ менамояд. Ба хотири дастгирӣ ва татбиқи сиёсати фарҳангӣ ва илмӣ аз ҷониби давлатҳои аъзо, аз ҷумла Ҷумҳурии Тоҷикистон, номинаҳо барои ворид намудан ба феҳристҳои фарҳанги моддӣ ва ғайримоддии ЮНЕСКО, инчунин Феҳристи ҷашнвораҳои ЮНЕСКО пешниҳод мегарданд, ки он имконияти хуби муаррифии фарҳанги миллати тоҷик дар арсаи байналмилалӣ мебошад. 31 июли соли 2010 бо қарори ҷаласаи 34-уми Кумитаи мероси умумиҷаҳонии ЮНЕСКО мавзеи «Саразм» ба Феҳристи мероси умумиҷаҳонии ЮНЕСКО ворид гардид, ки ин рӯйдод яке аз муҳимтарин пешрафт ва комёбӣ дар фаъолияти Комиссияи миллии Ҷумҳурии Тоҷикистон оид ба корҳои ЮНЕСКО ба ҳисоб меравад»,- афзуд котиби масъули Комиссияи миллӣ оид ба корҳои ЮНЕСКО Зулфия Бурҳон .

Ба андешаи номбурда, имрӯз ба ҷаҳониён исбот гаштааст, ки шаҳрҳои бостонии Саразм, Ҳисор, Кӯлоб, Хуҷанд, ёдгориҳои меъмории Мадрасаи Хоҷа Машҳад, Мақбараи Муҳаммад Башоро, Мақбараи Хоҷа Нақшрон, Мақбараи Мир Саид Алии Ҳамадонӣ, инчунин девормусаввараҳо, гаҷкориҳо бо тасвирҳои набототӣ, ҳандасӣ ва зооморфӣ аз шаҳри асримиёнагии Ҳулбук, девормусаввараҳои Панҷакенти қадим ва шаҳри Бунҷикат, муҷассамаи Буддо аз ёдгории бостонии Аҷинатеппа, Қалъаи Ямчун, Маъбади Зонг, ёдгории меъмории Карон, бозёфти «Хазинаи Амударё» аз ҳудуди шаҳраки эллинистии Тахти Сангин ва ғайраҳо ҳамчун нобиғаҳои нодири мероси фарҳангӣ аз ҷониби ҷаҳон эътироф гардидаанд.

-Муаррифии фарҳанги тоҷик ва эътироф гардидани он аз ҷониби ҷаҳониён барои ҳар сокини мамлакат ифтихори бузург аст. Зеро ҳифзу нигаҳдошт, истифодаи дурусти мероси таърихию фарҳангии мамлакат баҳри баланд бардоштани рӯҳияи ватандӯстӣ, худогоҳию хештаншиносии мардум ва хусусан наврасон ва ҷавонон мавқеи муҳим дорад, -мегӯяд ӯ.

Мавриди зикр аст, ки дар Сессияи 92-юми Созмони ЮНЕСКО 11 ноябри соли 2003 мусиқии «Шашмақом» ҳамчун шоҳкории мероси шифоҳӣ ва ғайримоддии инсоният ва қуллаи баландтарини мусиқии суннатии тоҷикон шинохта шуда, ҷашни аҷдодиамон-Наврӯзи хуҷаста мақоми байналмилалӣ гирифт, аввалин ёдгории таърихии Тоҷикистон «Саразм» ба Рӯйхати муҷассамаҳои Мероси фарҳангии умумиҷаҳонӣ ва  Боғи миллии Тоҷикистон ба феҳристи Мероси умумиҷаҳонӣ ворид шуданд.

Зулфия Бурҳон иброз намуд, ки  «имсол номинаҳои муштараки  «Кирмакпарварӣ» ва «Абрешимбофӣ» бо Ҷумҳурии Афғонистон, Озарбойҷон, Эрон, Туркия, Туркманистон ва Ӯзбекистон таҳия шуда, ба Кумитаи мероси фарҳангии ЮНЕСКО манзур гардидаанд».


2021-04-15 14:04:04    7    Муфассал...





Даҳсолаи байналмилалии амал «Об барои рушди устувор», солҳои 2018-2028




ВИДЕОПОРТАЛ

Ҳамаи видео



ТАҚВИМ

ПнВтСрЧтПтСбВс